港樓貴不等於要買外地樓

如果各位讀者有留意，應該發覺近來外地樓廣告越來越多。大台有阿sir帶團睇日本樓，報紙facebook有英美澳加馬泰越柬樓盤巡禮，有份報紙的海外版，近乎所有專欄都是agent做寫手，有唱好冇唱淡。

軟銷硬銷乜都出齊，全因港樓價格是世界之最，港人一做對比，便覺得外地樓便宜容易上車。但是否港樓貴，就等於外地樓平，而值得購買呢？這不是一個哲學問題，但許多人都會犯這種低級錯誤。

最多人會中的一招，就是因愛而擁有。這是人之常情，例如香港咁多哈日族，一年去幾次日本，都想擁有一間日本樓作為自住或投資之用，早前流行的Airbnb，以高回報低入場門檻作招徠，很多香港的日本仲介開埋地舖，實行跟本地地產代理睇齊，但入場費是十分之一，表面很吸引。

日本在上星期頒佈民泊新法，Airbnb平台八成違法民宿下架，因為限制營業日數最多一年180日，好似東京中央區，只允許周六中午至周一中午營業，點數都唔夠180日，回報率大幅下降，若想轉搵長租客，非核心區域會有難度。

就算不計新法案，違法民宿早在上年已備受當局注目，而且上兩年因Airbnb興起而升幅較多的大阪心齋橋、道頓崛、難波一帶，已經有近千間酒店房落成，你以為你比日本人更清楚哪裏有需求？加上近日的明星效應，真搞不懂為何人們會覺得有明星站台就值得投資這邏輯關係。

上月政權變天的馬來西亞，大選後有更多新盤推出市面，在大台有長達幾分鐘鱔稿式專題介紹，其中一個樓盤我剛剛上星期去當地睇過，以有室內設計名師為賣點，地段是不錯，但設計極不實用，因遷就外觀設計，全屋走廊佔總面積三成以上，1,300呎單位全屋四個厠所加浴室，主人房浴室還有名師設計的大大個中置浴缸，佔300呎，除這個外其他全部黑廁，令客飯廳加起來實用不夠200呎，賣港幣800萬。

另一個更絕的樓盤，所在位置不佳，賣點是預計在2024年落成的新地標，但馬哈蒂爾政府上台後，該地標已被暫停，暫時復工無期，而該樓盤已憑這賣點賣出九成，買家都是香港人及大陸人居多，皆因該樓盤的電腦合成相片實為大師級作品，入場費只是200萬港幣，很多人根本冇睇樓就買。附近千呎物業賣價大概50萬港幣。

當然你大把錢，當用小小錢買玩具冇所謂，這文章只奉勸得一注錢及少投資經驗的讀者，港樓貴，不是買外地樓的原因。

郭釗