驗樓睇落好簡單。今次《蘋果驗樓》嘗試自己出手，趁資深驗樓師詹濟南「詹Sir」出手前，小記分途出擊試吓驗樓，以為單位僅僅5大瑕疵，結果詹Sir來到再睇真啲，原來睇漏超過50項瑕疵，其中不乏大問題，包括洗手盆邊漏水、浴室瓷磚掃口粉稀淡如香爐灰、冷氣機散熱器電線外露有機會導致短路、主人浴室牆身滿佈空心磚卻沒有發現，單位驗樓評分63分。
業主李生今年3月以約1,119萬元買入海日灣1期B2座高層單位，實用788方呎，「近小朋友返學，又近自己返工，價錢又比市區平。間隔四正實用，收樓第一個感覺都幾好！」小記提早一個小時到單位，嘗試幫業主驗樓，結果發現5大瑕疵，包括露台2塊空心磚、客廳一條長逾1米的收水裂紋、牆身油漆不平滑、客廁瓷磚之間有罅隙、細房玻璃有一處崩裂。
詹Sir照舊帶徒弟陳智康「康仔」到埗，趁未入黑先睇玻璃，先檢查小記在細房發現的1處玻璃崩花是否準確。詹Sir存疑，經他驗樓棒膠柄一摔即甩，原來只是污迹，並謂：「崩唔係咁嘅，崩係閃亮。」然後在玻璃圈出額外3條花痕，「我無眼花！不過呢塊玻璃唔使換，因為佢係幕牆玻璃，行內對幕牆玻璃花痕的標準，每1平方米可接受不多於8條少於100毫米花痕。至於一般玻璃窗，每1平方米可接受不多於4條少於100毫米花痕。目前呢塊幕牆玻璃約3平方米，有排都未到要換。」但他強調，玻璃崩裂就一粒都不能接受，因為容易爆裂。他接着又指，「睇完窗又唔睇埋窗台，窗台有一條被刀劃痕，幾長㗎，要拋光磨滑。」
詹Sir續稱，主人房玻璃睇漏花痕，並指出位置說：「用指甲刮，會『棘』手㗎。條花痕仲長過100毫米，係超出標準，另外仲有2條短短地花痕。不過算啦，呢塊玻璃已判死刑，費事再睇，可以整塊玻璃換或打磨。」他再指，窗台石材掃口粉，一篤就散，近窗台牆身亦不平衡。
詹Sir檢查主人房套廁牆身，原來多塊空心磚睇漏，洗手盆塞水掣失靈睇漏。客廁角落位有肉眼可見約2吋罅隙，的確會滲水影響門框發黑，更嚴重有機會滲落下層，然而卻未有再驗周邊，就是磚縫之間的掃口粉極差。詹Sir用紙仔都篤得散，「掃口粉太稀，唔止1個窿仔。直頭全部掃口重頭執過。呢啲直頭唔覺係掃口粉，好似香爐灰。」記者說洗手盆放水，喉管無滴漏，以為成功過骨。詹Sir在盆邊潑水，「盆邊瀄膠唔靚，摸落好似離咗罅，如果抆得唔實，有機會落水入櫃底。」結果打開櫃底，如他所料，盆邊漏水。而且馬桶水箱無打開睇，沙泥多不是新鮮事，卻原來連裝備都未裝好。
露台2塊空心磚及客廳收水裂紋總算搵啱，但詹Sir又指，露台門邊防水膠邊已離罅，紙仔可拮入，「啲水有機會由罅仔入屋。」他總結，小記所找5大瑕疵，實在準確有2項，包括露台空心磚及收水裂紋，但其他超過50項瑕疵就睇漏，當中更有幾個嚴重問題走漏眼，包括洗手盆邊漏水、主人廁所空心磚、冷氣機散熱器電線掣有窿入水，如果入水有機會導致短路。單位驗樓得分63分，他的團隊驗過此樓盤約30個單位，評分由60多至80多分。
業主李生表示，現在買新樓都知道單位瑕疵在所難免，驗樓前料單位有70至80分，目前63分都總算及格，可以接受。收樓時看過單位都看不見很多問題，例如窗邊、漏水、空水磚等等，「自己睇過真係睇唔到，驗樓真係唔簡單！」
億京發言人回應，已即時與承辦商協調，有關修繕大部分工作亦已按業主要求處理，預計所有修繕工作可於11月內完成。就冷氣機散熱器電線外露事宜，已安排優先處理及已完成維修，此屬個別個案，已敦促承辦商加強檢驗，以避免同類事宜再次發生。
記者：陳家雄、張嘉鎣
資料來源：地產站
Facebook：上車攻略 hkbuyhome
更多上車情報：冠德苑樓王料向維港 錦暉苑最平156萬
