港女男神劉鳴煒曾經話，「情侶要維持長期關係，以有沒有樓作為重點，我認為是錯的。」但冇樓喎，你真係結婚？呢一年幾以來，雖然樓價曾有調整，但依然貴到好離地，沙田第一城兩房都講緊要5球，好似唔上車就呢世都上唔到咁。
過到壓力測試先批到按揭
你真係跟人諗住撲入市？咪住先，唔好以為係咁易儲到幾十萬首期，就可以上到車。因為依家香港按揭規定仍然好嚴，除咗要睇銀行肯借幾多成按揭畀你之外，仲要睇下你入息過唔過到壓力測試。曾經有月入30,000元的打工仔，買一層400萬元的樓都過唔到壓力測試，結果要撻訂，損失唔少。咁月入幾多先可以上到車呢？今次就同大家計一計數。
正常按揭供款利率計算
如以供款利率按息為2.375厘計算，分30年供款。第一次置業自住而且有固定收入，年紀唔係太大在40歲以下，所買單位又唔算太舊，最好在40年以下，最高可以按到90%。但要留意，計完的每月供款，必須低於入息的45%。
舉個例，一層400萬元樓，首期40萬元，貸款額為360萬元，每月供款為13,992元，入息最少便要31,093元。以為人工有31,093元以上就無問題？咪住！最難一步係通過壓力測試。
假設利率上升3厘，供款利率變為5.375厘，每月供款會增至20,159元，而供款要佔每月入息比率會增加至55%以下。即是說，你每月入息最少要36,653元先過到關！所以話，目前上車盤大部份都是4字頭，但一個月入30,000元的打工仔，根本冇可能上車。
仲有一點，借六成以上按揭（非自用為五成），係需要畀按揭保險，上述例子就要俾逾15萬元。如果冇咁多錢就要加借，咁每月供款額又會大咗，在壓力測試下，最低入息要求會變左38,247元啦。
用呢套方式去推算其他樓價的最低入息要求，同樣借九成按揭，分30年還，會得出以下結果：
450萬元以上 最多借80%
要留意，九成按揭兼借按揭保險計劃，只適用於400萬或以下物業，如在400萬至450萬元的物業，可借八成至九成之間。惟450萬至600萬元的物業，則最多只可以借八成，即是首期又要儲多啲。不過講明上車，都唔好諗到咁高樓價啦。
仲要提提各位，買樓前除預備首期，還要預留其他開支，包括印花稅、律師費合約、屋契或按揭契、代理佣金等等。350萬元的樓，呢啲洗費加加埋埋都起碼要預留10萬元。呢筆錢都仲未計裝修費，所以話，係香港上車真係一啲都唔易。
編按：以上資料僅按參考，一切以承造按揭的金融機構提供的最新數據為準。
撰文：SmartED編輯部
圖片：新傳媒資料室、unsplash、中新社
資料來源：SmartED
Facebook：上車攻略 hkbuyhome
更多上車情報：【樓換樓】面積愈細呎價愈貴 如何一房搬三房
