香港人從來都是名牌奴隸獸，買衫買鞋買袋買錶通通都要名牌，就算買車買樓都一樣，就算貴一截都要買名牌先覺得好，覺得品牌效應就係品質保證，之但係，又係唔係所有名牌都係有品質呢？又或者咁講，就算同一個品牌，質素上嘅差別，其實都可以好大。
市面上好多大型商廈，都好喜歡用某幾間外資行做物業管理，特別係「S」字頭、「C」字頭同「D」字頭呢幾間，都係一啲甲級商廈會用的管理公司，早陣子有朋友去租樓住，睇樓嘅時候見到大堂貼住管理公司個牌，就係上面所講幾間名牌外資行其中一間做管理，代理姐姐見到朋友好好奇咁望住個牌，即刻力sell話「係啊，呢度係呢間公司做管理㗎」，咁阿朋友仔即時有晒信心，覺得管理應該都會幾好啦。
點知住咗無耐，阿朋友開始同佢啲鄰居混熟，仲開埋個whatsapp群組，得閒講吓邊家邊戶點點點，又或者講吓個看更壞話。一開始聽到個個鄰居都叫個早更看更做「蛇王X」，朋友都覺得好奇怪，不過因為佢收工比較夜好少見到早更看更，所以唔覺得有咩問題。
但係當聽得多鄰居咁樣叫，阿朋友仔就留意多啲，加上有一排放大假，接觸到蛇王X既機會多咗，佢就發覺，日頭的確經常無人睇門。另外，幢大廈樓下好多檔口仔，人來人往，但大廈好多單位都被人租來做倉，好多時唔知係咪檔口仔嘅人想方便自己，定係看更唔想成日開門，大門長期開住同俾嘢頂住，中門大開，所有外人都可以自出自入。
聽朋友講，由於大廈長期中門大開，成日都有好多傳單塞滿信箱，仲試過有收數佬上樓拍門，仲好似話被收數嘅嗰戶人，其實係看更嘅親戚。收數佬上門咁影響大廈嘅事，有責任心嘅看更又點能夠俾佢發生？
另外，幢大廈係由單一業主持有出租，即是每家每戶只要有咩問題，都係搵管理處聯絡裝修師傅搞掂，其中有一次佢壞水喉，開咗個水龍頭之後栓唔返，水長流，打俾看更問佢點搞，個看更竟然答佢，師傅前日嚟咗，唔會咁快嚟，你自己睇吓點啦，朋友於是自己搞咗，而裝修師傅5日後先出現，咁嘅服務，間管理公司係咪撞名咋。
資料來源：Yahoo財經
Facebook：上車攻略 hkbuyhome
更多上車情報：上車攻略 – 元朗區
室內設計師：
